ASC Poem (Anglo Saxon)

Her Aethelstan cyning, eorla dryhten,
beorna beahgifa, and his brothor eac,
Eadmund aetheling, ealdorlangne tir
geslogon aet saecce sweorda ecgum
ymbe Brunanburh. Bord weal clufan,
heowan heatholinde hamora lafan
afaran eadweardes , swa hi geaethele waes
fro cneomaegu thaet hi aet campe oft
with lathra gehwaene land ealgodon,
hord and hamas. Hettend crungun,
Sceotta leode and scipflotan,
faege feollan. Feld daenede
secgas hwate siththan sunne up
on morgentid, maere tungol,
glad ofer grundas, godes candel beorht,
eces drihtnes, oth sio aethele gesceaft
sah to setle. Thaer laeg secg maenig
garu ageted, guma Northerna
ofer scild scoten, swilce Scittisc eac,
werig, wiges saed.

West-Seaxe forth
andlange daeg eorod-cystum
on last legdon lathum theodum,
heowon here-flieman hindan thearle
mecum mylen-scearpum. Mierce ne wierndon
heardes hand-plegan haeletha nanum
thara-the mid Anlafe ofer ear-gebland
on lides bosme land gesohton,
faege to gefeohte. Fife lagon
on tham camp-stede cyningas geonge,
sweordum answefede, swelce seofone eac
eorlas Anlafes, unrim herges,
flotena and Scotta. Thaere gefliemed wearth
North-manna brego, niede gebaeded,
to lides stefne lytle weorode;
cread cnear on flot, cyning ut gewat
on fealone flod, feorh generede.
Swelce thaere eac se froda mid fleame com
on his cyththe north, Constantinus,
har hilde-rinc. Hreman ne thorfte
meca gemanan; he waes his maga sceard,
freonda gefielled on folc-stede,
beslaegen aet saecce, and his sunu forlet
on wael-stowe wundum forgrunden,
geongne aet guthe. Gielpan ne thorfte
beorn blanden-feax bill-gesliehtes,
eald inwitta, ne Anlaf thy ma;
mid hira here-lafum hliehhan ne thorfton
thaet hie beadu-weorca beteran wurdon
on camp-stede cumbol-gehnastes,
gar-mittunge, gumena gemotes,
waepen-gewrixles, thaes hie on wael-felda
with Eadweardes eaforan plegodon.

Gewiton him tha North-menn naegled-cnearrum,
dreorig darotha laf, on Dinges mere
ofer deop waeter Dyflin secan,
eft Ira lang aewisc-mode.
Swelce tha gebrothor begen aetsamne,
cyning and aetheling, cyththe sohton,
West Seaxna lang, wiges hremge.
Leton him behindan hraew bryttian
sealwig-padan, thone sweartan hraefn
hyrned-nebban, and thone hasu-padan,
earn aeftan hwit, aeses brucan,–
graedigne guth-hafoc, and thaet graege deor,
wulf on wealda.

Ne wearth wael mare
on thys ig-lande aefre gieta
folces gefielled beforan thissum
sweordes ecgum, thaes-the us secgath bec,
eald uthwitan, siththan eastan hider
Engle and Seaxe upp becomon,
ofer brad brimu Britene sohton,
wlance wig-smithas, Wealas ofercomon,
eorlas ar-hwaete eard begeaton.

(From ASC MS ‘A’)